தோல்வியை ஒப்புக்கொண்ட ட்ரம்ப்: ஆட்சி மாற்றம் தொடங்கியது!

அமெரிக்காவில் நவம்பர் 3ஆம் தேதியன்று அதிபர் தேர்தல் முடிந்து வாக்கு எண்ணிக்கை முடிவுகள் சில தினங்களில் வெளியாகின. இதில், ஜனநாயக கட்சி வேட்பாளரான ஜோ பைடன் பெரும்பான்மையான வாக்குகளுடன் வெற்றிபெற்றுள்ளார். மறுபுறம், அதிபர் டொனால்ட் ட்ரம்ப் பின்னடைவை சந்தித்தார்.

எனினும், தேர்தலில் மிகப்பெரிய மோசடி நடைபெற்றிருப்பதாகவும், தேர்தல் முடிவுகளை ஏற்றுக்கொள்ள முடியாது எனவும் டொனால்ட் ட்ரம்ப் தொடர்ந்து பிடிவாதம் பிடித்தார். ஆனால், சூழ்நிலை அவருக்கு எதிராக திரும்பிக்கொண்டிருக்கும் நிலையில், ட்ரம்ப் தேர்தல் தோல்வியை ஒப்புக்கொண்டிருப்பதாக தெரிகிறது.

தேர்தலில் ஜோ பைடன் வெற்றிபெற்றுள்ளதாக அமெரிக்க அரசின் பொது சேவைகள் நிர்வாகம் ஒப்புக்கொண்டுள்ளது. இந்நிலையில், பொது சேவைகள் நிர்வாகம் விதிமுறைப்படி என்ன செய்யவேண்டுமோ அதை தொடங்கும்படி ட்ரம்ப் பரிந்துரைத்துள்ளார்.

ஜோ பைடன் பலவீனமானவர்: சீனா தாக்கு!

இதுகுறித்து டொனால்ட் ட்ரம்ப், “விதிமுறைப்படி என்ன நடவடிக்கைகளை மேற்கொள்ளவேண்டுமோ அதை செய்யும்படி பொது சேவைகள் நிர்வாகத்தின் தலைவர் எமிலி மர்பிக்கு பரிந்துரைத்துள்ளேன். அதற்கு ஒத்துழைக்கும்படி எனது குழுவினரிடமும் அறிவுறுத்தியுள்ளேன்” என்று தெரிவித்துள்ளார்.

ஆட்சி மாற்றத்திற்கான நடவடிக்கைகளை தொடங்கும்படி ட்ரம்ப் அறிவுறுத்தியிருந்தாலும், தேர்தல் முடிவுகளை தொடர்ந்து எதிர்க்கப்போவதாக ட்ரம்ப் தெரிவித்துள்ளார். இந்நிலையில், ட்ரம்பின் பரிந்துரைப்படி ஆட்சி மாற்றத்திற்கான பணிகள் தொடங்கியுள்ளன. ஜனவரி 20ஆம் தேதி பதவியேற்பு விழா நடைபெறும்.

Leave a Reply

Your email address will not be published.